Modalen sa nei: – Krava frå Kystverket er ikkje urimelege

Etter at høyringa starta, tok reiselivsaktørar i Bergen kontakt med kommunen med ønske om å drøfte fartsgrensene. Kommunestyret valde torsdag samrøystes å ikkje sende høyringsuttale — og let Kystverkets forslag stå urørt.

Alle 13 representantane stemte for å ikkje sende nokon høyringsuttale til Kystverket sitt forslag om fartsgrenser i sjøområda i kommunen.

Klager om utvasking starta heile prosessen

Bakgrunnen for saka er gjentekne klager frå grunneigarar og hytteeigarar langs Mofjorden om at høg fart frå turistbåtar har ført til utvasking og skader på eigedommane. Modalen kommune vedtok i desember 2025 ei eiga forskrift om fartsgrenser for fritidsfartøy, og bad samstundes Kystverket om å regulere næringsfartøya innanfor sitt ansvarsområde.

Kystverket sende deretter eit forslag på høyring som i hovudsak speglar kommunens eiga forskrift, med same geografiske avgrensingar også for næringsfartøy.

Dialogmøte i Bergen tre dagar før sakspapira gjekk ut

Etter at høyringa starta, tok reiarlaga Rødne og Fjordcharter, Bergen Næringsråd og European Cruise Service kontakt med ordføraren. Måndag 1. juni — berre tre dagar før sakspapira skulle sendast ut — vart ordførar og rådmann inviterte til eit møte i Bergen, fasilitert av Visit Bergen. Også Bergen Hamn og NHO Reiseliv var representerte.

Aktørane presenterte tre konkrete endringsforslag: justering av grensene for fartsregulering i Romarheimsfjorden og inn mot Mo hamn, og omsyn til nødvendig styrefart gjennom sjølve Mostraumen. Argumentet deira var at turane, som i dag tek om lag 3,5 timar, ville bli forlengja med inntil ein halvtime.

Fjordcharter karakteriserer møtet som sakleg og utan press.

– Det var eitt dialogmøte, og det fanst ikkje press på det aktuelle møtet. Møtet gjekk føre seg sakleg; løysingar og utfordringar vart drøfta, skriv selskapet i ein tilbakemelding til Modalsnytt.

Næringen la òg fram eit forslag dei meiner ville kome hytteeigarane til gode.

– Det vart lagt fram forslag frå næringa som ville gjeve gevinst for hytteeigarar, ved at all trafikk skulle gå på den ubebodde sida av fjorden. Forslaget støtta òg innspel frå hytteeigarar på Nøttveit, opplyser Fjordcharter.

– Krava er ikkje urimelege

Det var Siren Bruvik Øvre-Helland (Samlingslista) som fremma forslaget om å la Kystverkets framlegg stå urørt. Ho viste til at Kystverket alt har strekt seg langt — der kommuneadministrasjonen opphavleg foreslo 5 knop, har Kystverket auka grensa til 8 knop med tilvising til at bølgjeverknaden er om lag den same.

Ho var også tydeleg på at ho stilte spørsmål ved om reiselivsnæringa har lytta til lokalsamfunnet tidlegare. Innbyggjarar, hytteeigarar og båtturistar har gitt tydelege tilbakemeldingar over tid utan å nå fram, sa ho i debatten.

Brev frå Nøttveit-hytteeigarar i siste liten

Kvelden før møtet kom det inn eit brev frå hytteeigarar på Nøttveit. Bruvik Øvre-Helland siterte brevet frå talarstolen:

– Det kan ikkje vere sånn at ønske om kortare reisetid og høgare forteneste for kommersielle aktørar skal gå på kostnad av tryggleik, miljø, eigedommar og livskvalitet for lokalbefolkninga, las ho opp.

Fleire representantar slutta seg til. Ein representant peika på at Kystverket sjølv skriv at ulempene for næringa «ikkje er større enn at dei vert oppvegne av dei omsyna som talar for regulering».

Rådmannen la saka fram utan tilråding

Eit særtrekk ved saka er at rådmannen la ho fram heilt utan tilråding. I saksframlegget skreiv han at administrasjonen ikkje har fagkompetanse til å vurdere konsekvensane av endringsforslaga når det gjeld bølgjepåverknad, straumforhold og seglingsmønster.

Med tre dagar mellom møtet i Bergen og utsendinga av sakspapira, var det heller ikkje tid til å gå grundig gjennom innspela.

Rettingar, 18. juni 2026: Ein tidlegare versjon av artikkelen omtalte kontakten frå reiselivsnæringa som «månader med press» — dette er ikkje korrekt. Høyringsfristen var òg feil oppgjeven som 17. juni; korrekt frist er 17. juli 2026. Artikkelen er oppdatert med Fjordcharter sin omtale av møtet 1. juni, inkludert deira forslag om å rute all trafikk på den ubebodde sida av fjorden.