Modalen ville heidre Johannes Moe. Fondet er ikkje etablert, men markeringa kjem

Pengane gjekk til sonderingar

Då kommunestyret i Modalen løyvde inn til 118.000 kroner i september 2025, var det til arbeidet med å få på plass eit fond i namnet til Johannes Moe. Midlane blei henta frå næringsfondet til kommunen. Snautt eit år seinare er pengane brukte, og arbeidet har stoppa opp.

– Desse pengene er allerede brukt på å gjere sonderingar og opprette kontaktar. Det gjenstår fortsatt arbeid før ein eventuelt kan få etablert eit fond. Kommunestyret ønska ikkje å løyve fleire midlar til eit vidare arbeid her, seier ordførar Linda Neset til Modalsnytt.

Formannskapet innstilte på løyvinga 16. september, og kommunestyret vedtok ho samrøystes 25. september. Rapporten om arbeidet som er gjort, blei lagd fram for kommunestyret som orienteringssak 19. mars i år.

På spørsmål om når fondet eventuelt kan begynne å dele ut midlar, grunngir ordføraren svaret slik: så lenge det ikkje blir jobba med å etablere eit fond, er heller ikkje spørsmålet om bruken av fondet relevant.

Initiativet kom utanfrå

Det var ikkje kommunen som sette det heile i gang.

I slutten av juni 2025 blei Neset kontakta av tre tidlegare kollegaer av Moe, som tok initiativ til å opprette eit fond i hans namn. 26. juni hadde ordførar og rådmann eit digitalt møte med dei tre, og etterkommarane til Moe er sidan sjekka ut og stiller seg bak initiativet. Kontrollutvalet stadfestar i møteprotokollen frå 1. oktober 2025 at ordføraren orienterte om førespurnaden.

Vedtaket slår fast kva fondet skulle gjere: stimulere unge med høgare utdanning til å etablere verksemd i kommunen. Initiativtakarane såg for seg aldersgruppa 20 til 40 år, med stipend og andre insentiv til dei som ville starte ny næringsverksemd. Tanken skulle spegle Moe sin eigen visjon.

Ordføraren kjende ikkje historia frå før, og måtte setje seg inn i kven Moe var etter at dei tre tok kontakt.

– Han spelte ei viktig rolle i utviklinga av norsk teknologi, forsking og petroleumsverksemd, og var sentral i oppbygginga av forsking og undervisning knytt til olje- og gassverksemda i Norge. Slik eg ser det var dette ei svært viktig rolle vi tok eigarskap i, seier Neset.

Markering til hausten

Sjølv om fondsarbeidet står i stampe, skal ikkje hundreårsdagen gå upåakta hen. Moe vart fødd i Modalen i 1926, og til hausten inviterer kommunen til markering.

– Eg vart overaska då eg fekk høyre historia om Johannes Moe. At ein mann frå Modalen har hatt ei så viktig rolle i vår teknologiske utvikling og då spesielt innan petroleumsverksemda, det synes eg var spennande, seier Neset.

– I haust inviterer vi til ei markering av at det i år er 100 år sidan Johannes vart fødd, og eg håpar at alle som har moglegheiten til det, vil nytte høvet til å verte betre kjent med denne delen av historia vår.

Markeringa blir arrangert torsdag 17. september, og er open for alle som ønskjer å delta. Meir informasjon kjem på nettsida til kommunen i desse dagar.

Mannen bak namnet

Moe flytta frå Modalen til Bergen for å ta gymnas, og blei uteksaminert frå Norges Tekniske Høgskule i 1952. Frå 1962 var han professor ved NTH, og frå 1972 til 1976 rektor ved same institusjon. Deretter tok han over som administrerande direktør i SINTEF, ei stilling han hadde frå 1977 til 1989, og frå 1993 til 1999 var han president i Norges tekniske vitenskapsakademi.

Han blei innvald i National Academy of Engineering i USA i 1977, og seinare tildelt Kommandør av St. Olavs orden. Som pensjonist bygde han opp den interne utdanninga innan teknologi og leiing i Statoil, i dag Equinor. Han døydde 19. september 2023 i Trondheim.

Ifølgje saksdokument frå kommunen hadde Moe vesentlege roller i det norske samfunnet i den perioden som la grunnlaget for vekst og utvikling basert på funn av olje og gass på norsk kontinentalsokkel.