Friluftsskule i Modalen vart fullbooka undervegs

Fleire kom til undervegs

Friluftsskulen i Modalen vart arrangert for fyrste gong i skuleferien, og responsen overraska. Sju barn melde seg på i forkant, men på det meste var 11 barn innom dei tre dagane tilbodet varte.

– Overraskande stor auke, meir enn me hadde venta, seier Lisbet Dyrkolbotn, som står bak arrangementet.

– Sidan det var planlagt i fellesferien og tilbodet var nytt, hadde me ikkje venta så mange påmelde. Det var sjølvsagt eit håp om mange påmelde, men realistisk tenkte me det ville komme få. Når det då dukka opp fleire, var me raus med plassane, og dei fekk vere med sjølv om dei ikkje var påmelde frå starten, seier Dyrkolbotn.

Bak tilbodet står Modalen frivilligsentral saman med UngJobb, i samarbeid med Bergen og Omland Friluftsråd og Frilager Bergen og Omegn.

Friluftsskulen er eit lågterskel aktivitetstilbod, retta mot barn i alderen 10 til 13 år, og målet er meistring, gode ferieopplevingar og å skape interesse for friluftsliv i nærmiljøet.

Kvifor trur ho fleire ville vere med undervegs? Dyrkolbotn peikar på at barna høyrde om det frå andre, at det er få andre fritidstilbod i Modalen om sommaren, og at det var gratis og lågterskel å delta.

– Friluftsskule har skule i namnet, og det freistar nok lite med skule i ferien for barn, hehe! Eg trur nokon var usikre på innhaldet først, og tenkte at det ville bli for likt skule. Når dei fekk nyss i at dette var kjekt, var det fleire som kom til, seier ho.

Fisking, førstehjelp og natt i lavvo

Dei tre dagane baud på eit variert program. Deltakarane fekk prøve seg på førstehjelp, fisking i Mostraumen og tur til Nedstavatnet, før dei runda av med overnatting i lavvo.

Båttur og fisking i Mostraumen var det klare høgdepunktet, ifølgje Dyrkolbotn, som fortel at deltakarane sjølve har trekt det fram i etterkant.

– Eg merkar også at interessa for kart og navigering var ganske stor, og dette var eit tema me berre så vidt fekk gått innom på årets friluftsskule. Det same gjeld førstehjelp, særleg å få prøve å legge bandasje på kvarandre. Dette er verdifulle erfaringar som gjer oss ein peikepinn på kva me kan gjere meir av seinare, seier ho.

For mange av barna i Modalen er dette aktivitetar som ligg rett utanfor stovedøra, men som ikkje alle har prøvd før. Nettopp den nærleiken til eige nærmiljø er poenget med friluftsskule-konseptet.

AI-illustrasjon

Utstyret vart pressa til det ytste

Den store oppslutninga var ikkje berre gledeleg — ho sette òg tilbodet på prøve. Med langt fleire barn enn planlagt måtte arrangørane tenkje kreativt for å ha nok utstyr til alle.

– Me hadde lånt utstyr frå Frilager Bergen og Omegn, og dette vart for lite for talet på barn. Men me løyste dette med at me supplerte med utstyr frå BUA Modalen, og nokre barn tok med eige utstyr heimefrå, fortel Dyrkolbotn.

Tilskot gjorde det mogleg

At tilbodet i det heile kunne gjennomførast, skuldast tilskotsmidlar frå Bergen og Omland Friluftsråd, i tillegg til at Frilager Bergen og Omegn lånte ut utstyr. Utan denne støtta hadde det vore vanskelegare å få på beina eit gratis, lågterskel tilbod i ei lita kommune som Modalen.

Usikker framtid, men stor interesse

Sjølv om årets friluftsskule vart ein suksess, er det ikkje gitt at han blir ein fast tradisjon.

– Usikkert, det krev meir ressursar enn i år, seier Dyrkolbotn.

– Me håpar frivilligheita i Modalen vil vere med å halde friluftsskulen oppe. Me er avhengige av engasjerte frivillige for å gje deltakarane eit godt tilbod. Modalen kommune har eit vanvittig godt grunnlag for å arrangere friluftsskule, og det er mange retningar friluftsskulen kan ta. Me har allereie vore i kontakt med interesserte som gjerne vil vere med å arrangere friluftsskule i framtida, seier ho.

Arrangørane rettar ein takk til støttespelarane etter den vellykka fyrsteomgangen. Med god oppslutning frå både påmelde og barn som kom til undervegs, ligg det til rette for at friluftsskulen kan verte ein fast post i modølingane sin ferie framover — dersom ressursane følgjer med.

Les meir hos Modalen kommune.